কথা অমৃত সমান

স্মৃতি কুমার সিংহ

সৃষ্টি প্রকাশকল্প বার সংযোগ

হাবি সৃষ্টিশীল কামর থুনিগৎ পেয়ারতা কল্পনা৷ কল্পনাৎত জরম অর সৃষ্টি৷ জন্মলগ্নৎ সৃষ্টি এহান পানির ফুটাগর সাদানে৷ বর্ণ নেই, হুৱাৎ নেই, আকৃতি নেই৷ সিচ্চিল লিকলিক – অদৃশ্য৷ যেবাকা সৃষ্টিহানরে কুনো এন্‌কোডিং ধারা আহানল প্রকাশ করানি অর, ঔবাকা সৃষ্টিহান অর দৃশ্যমান৷ এনকোডিং ধারা ঔহান ইলয়া সৃষ্টি আহানরে তুলিয়া ধরের রূপ এহানরে মাতিয়ার প্রকাশকল্প (expression) আহান ৷ এনকোডিং ধারা এহানরে ভাষাহানও বুলানি য়াকরের৷ তঙাল তঙাল ভাষাল ইকরা প্রকাশকল্প ঔতারেই আমি  আজি মাতিয়ার চিত্র, কলা, কারু, কবিতা, কথাসাহিত্য যতইতি৷ তঙাল তঙাল ভাষার তঙাল তঙাল বণর্মালা৷ কবিতা বারো য়ারির বর্ণমালাৎ থার চিত্রকল্প বারো অলংকার – অনুপ্রাস, যমক, উপমা, উৎপ্রেক্ষা আদি৷ প্রকাশকল্প এতা ভাষা অনুযায়ী তঙাল অইলেও হাবি প্রকাশকল্পর উদ্দেশ্য আকহান- সংযোগ স্থাপন৷ সৃষ্টিকারর, মানে কবি, লেখক, চিত্রশিল্পী ঔগর লগে রসগ্রাহি গোষ্টি, মানে পাঠক বা দশর্কর সংযোগ৷ রসগ্রাহি গোষ্টি এহান জগতর হাবি মানুও অইতে পইরে, নির্দিষ্ট রসে রসিক বিশেষ হুরকাং গোষ্টি আহানও অইতে পারে৷ সৃষ্টিকারর মাতিল কথাহানি প্রকাশকল্পর মাধ্যমে রসগ্রাহি গোষ্টির মনে ফৌঅনি পারলেহে সার্থক সংযোগ৷ সংযোগ আহান কিসাদে সার্থক অরতা? সৃষ্টিকার বার রসিক ফ্রিকুৱেন্‌সি আকহানাৎ টিউন্ড্ অইলেহে সংযোগ আহান সাথর্ক অরতা৷ প্রকাশকল্প ঔহানর মাধ্যমে স্রষ্টা বার রসগ্রাহির ভিতরে ধারণা কতহানর আদান-প্রদান অর৷ ঔ ধারণার গজে ভিত্তি  করিয়া দ্ৱিয়গিয়ে বুজাপরা  আকহানাৎ ফৌঅনি পারলেহে টিউনিং অইল বার সংযোগ অইল বুলিয়া আমি মাতে পারিয়ারতা৷ পাব্‌লো পিকাসোর চিত্র ঔতাই অংক শাস্ত্রর মানু আগরাং কুনো অর্থ আহান সংযোগ করানি নুৱারতে পারে বা অংক শাস্ত্রীর অন্তর সমীকরণ আহানে পিকাসোরাং কুনো অর্থ দেনিৎ বিফল অইতে পারে৷ ঔহানর মানেহান এহান নাগই যে পিকাসোর চিত্রর বার অংক শাস্ত্রীর সমীকরণর কুনো অর্থই নেই৷ আসলে এপেইৎ সংযোগ বিফল অছেতা৷ কিয়া বুললে, দ্ৱিয়গিয়ে বুজাপরা  আকহানাৎ ফৌঅনি নুৱারেছিতা৷ অর্থাৎ তানু ফ্রিকুৱেন্‌সি আকহানার মানু নাগই ঔহানে  টিউনিং নাছেতা৷ স্রষ্টা বার রসগ্রাহির ভিতরে অবাধে যেবাকা ধারণার আদান প্রদান অর ঔবাকাই সৃষ্টি অর নান্দনিক আনন্দ ৷ তানু অবগাহন করতারা আনন্দধারাৎ৷ কবিতা গল্প, এলা, নাছা, চারু কলা হাবি শিল্পর য়ারিহান আকহান ৷ রূপ তঙাল তঙাল, নন্দনবৃত্ততে আকগ৷  কথাসাহিত্যর য়ারিহানও তঙালহান নাগই৷

 নন্দনবৃত্ত

নন্দনবৃত্তর অকরাগও জীবনধারা বুলানি পারিয়ার৷ মানুর জীবন এহান মাটিহান৷ মাটিহানর ভিতরেই আছে ঠইগ৷ ঠইগর আহানি-কাদানি, বক-টাটি, হিন-লাংলা তিলয়া যে হুৎগ বহের ঔগই জীবনধারা৷ ঔ জীবনধারাৎ বুরদিয়া লপহান বুজে মাটি আনিয়া পারগৎ বয়া রূপকার আগই যেবাকা রূপ আকেইহান দের ঔবাকা অর শিল্প – কবিতা, গল্প, নাটক, চিত্র, কলা, গীত আদি৷ শিল্প এহান যেবাকা প্রকাশকল্প আহানল পরিবেশন করানি অর ঔবাকা শিল্পী বার শিল্পরসিক মাটিহান এরেদিয়া ভাবর আকাশে আকসাটে ফরদিতারা৷ মনহানাৎ ভাবপুঞ্জ পুলর৷ ভাবহান যেবাকা চি য়ৌঅর, ঔবাকা ভাবপুঞ্জ সম্পৃক্ত অর৷ ভাবপুঞ্জৎ অর রসসঞ্চার ৷ জুরিজুরি রস জঙিয়া পড়ের বার সমাজ জীবনে – মাটিহানাৎ৷ ঠইগ তিঙের৷ তিঙা ঠইগৎ হুৎগ বহের – জীবন ধারা৷ আরতারাং মাতানি নুৱারতৌ, মোরাংতে এহানেই নন্দনবৃত্ত৷ নন্দনবৃত্তর মূল উদ্দেশ্যহান নান্দনিক আনন্দ। সৃষ্টিশীল ইকরাৎত সৃষ্টি অর সৃষ্টিশীল কল্পনা, সৃষ্টিশীল কল্পনাৎত সৃষ্টি অর নান্দনিক আনন্দ৷ হাবি শিল্পর য়ারি আকসাটে দেনি ঔহান এপেইৎ নাইতই৷ আজি কথাসাহিত্যর, বিশেষ করিয়া গল্পর য়ারিহান সিচ্চিল দেনিয়ে মনাছু৷ অন্য শিল্পর য়ারি মি মূল ফাৎকরে হার নাপাছু৷ গল্পরতাও না৷

‘জাগরণ’ পত্রিকার দিনেৎত আজি পেয়া প্রকাশিত বিষ্ণুপ্রিয়া মণিপুরী গল্প, হবাই সাক্তিয়ে, মোট তিনশহানর গজেতে নাইব। উপন্যাসতে আককুড়িহানও নাফাথাইব। বিষ্ণুপ্রিয়া মণিপুরী কথাসাহিত্যৎ পইলা গল্পসংকলনহান শ্যামানন্দ সিংহর ‘অজা বাবুলোক’। পরিমাণর বিচারে জাত আহানর কথাসাহিত্যর বারনগর নিয়াম লেইরা নাতাহান এহান।  কিন্তু এতাৎত বাছিয়া উচ্চমানর গল্পর সংকলন আহান করলে আমি অন্য জাতর কথাসাহিত্যর লগে ফালুৎ নাপ্পাল করিয়া বহানি পারতাঙাই। ঔতাও, ঔসাদে উচ্চমানর গল্পর সংখ্যা পঞ্চাশ হানর গজেতে নাইব বুলিয়া মনে অর। এরে নাতা এহানর কারণহান গল্প ইকরেকুরার অভাব, ইকরেকুরাগি আছি ঔতারতাও সিরিয়াস্‌নেসর অভাব, গল্প সমালোচকর অভাব। হাবিৎত ডাঙর অভাবহান্তে দীক্ষিত পাঠকর। ইংরাজি, অসমীয়া বা বাংলা সাহিত্যল বিশ্ববিদ্যালয়র ডিগ্রি নিয়া পালছি গিরিগিথানি ঔগিও কলমগি আকুবালা গাটিয়া ঘরে বহেছি। আমার সাহিত্যর পাঠকতে সাহিত্য এহানর হাবি দায়িত্ব পুল্লাপে ইকরেকুরাগিরাং দিয়া আত পুছিয়া ঙকখি-ঙারাল অয়া সমাজর মন্দির-মালঠেপ হংকরানিৎ, সংগঠনর কৌলিৎ বার জিরনপরে ইন্টারনেটে ফেস্‌বুকে কৌলিৎ তন-মন-ধন-ক্ষণ এক করিয়া লাগেছি। আর কুংগি আয়া আমার এ অভাব এহানি পূরণ করে দিতাইতা? মি সাহিত্য তত্ত্ববিদগ নাগই, সাহিত্যল তামকরেছুগও নাগই। গল্পর বিষয়েও নিয়াম হারনাপাছু। গেলগা কত বছরে গল্প কতহান ইকরানির অভিজ্ঞতাৎত যেহানি হারপেইলু ঔহানি হাজেয়া দেনির ঠৌরাংহান- এরে ইকরা এহান৷

কথাসাহিত্য

সাহিত্য বার literature শব্দ দ্বিয়গির অর্থহান আকহান অইলেও ব্যাপ্তিহানাৎ নিয়াম-কম এসাদে বারিক ভেদ আহান আছে বুলিয়া পণ্ডিতে মাৎতারা। ইংরাজি literature শব্দ এগই বর্ণমালাল ইকরা নান্দনিক প্রকাশকল্প, মূলতঃ কবিতা, গীত, গল্প, উপন্যাস আদি শিল্পরে পুল্লাপে বুঝার। সাহিত্য শব্দ এগই বর্ণমালাল ইকরা বার থতাল টটরা দ্বিয়জাতর ঔ শিল্পরে বুঝার। অর্থাৎ সাহিত্য শব্দ এগর ব্যাপ্তিহান literature শব্দ এগরাংত নিয়াম। কথাসাহিত্য বুলতে সৃষ্টিশীল কল্পনাৎত সৃষ্টি অর ঘটনা, চরিত্র, কর্মকান্ড বার কথাবার্তা আদিল হঙর শিল্প ঔতারে বিশেষ করিয়া বুঝার। ভারতর নানার ভাষাৎ এতারে কথাসাহিত্য বা বাট্টি করে কথা বুলতারা। কথা এতা হাবি মারলর হাবি চিরির মানুরে যুগে যুগে আনন্দ দিয়া আহের। ঔহানে মানুৱে কথা এতা নিয়াম ঠিক পেইতারা, কথা হুনানির সালে খৌরাংল বাছেয়া থাইতারা। ঔহানলহে মাৎতারানাই – কথা অমৃত সমান।

আমার ঠারে কথা এতারে য়ারি বুলিয়ার। লোককথা, গল্প, উপন্যাস হাবিরে আমি পুল্লাপে য়ারি বুলিয়ার। আধুনিক সাহিত্যর রীতি-নীতি ইলয়া আজিকালি ইকরানি অর য়ারি আকতারে গল্প বার আরাক আকতারে উপন্যাস বুলানি অকরলাংতা। আমারাংতে হাবি য়ারি। য়ারি এতা কুম্বাকা জরম অছেতা? ডাঙর সুৱাল আহান। সঠিক জুৱাবহান দেনি নিয়াম চিল। মানু যেবাকা গুহাৎ আছিলা ঔবাকা বাপক মালক শিকারেৎত আলয়া আহিলে শৌসুমারাই কিতাকিতা দেখলা, কিসাদে শিকার করলা হারপানির খৌরাঙে তানুরে কলকরিয়া ধরলা। জিগর চারিবেদে বয়া হেদে হেদে গুহাবাসি ইমাবাবার থতাৎত জরম অইল পাউরি পইলা য়ারি। মুঙর কনাক শৌগির মনহানি পাক সালকরিয়া ফরদিলা কল্পনার হাকহানাৎ। ঔ কনাক শৌ ঔতা আকদিন বুজন অইলা। বুজনরাংত হুনা য়ারি ঔতা তানু পিছেকার চিরিরাং দিলা। এসাদে থতাৎত থতাৎ য়ারি এতা চিরি লালয়া আমারাং ফৌঅইলহা- বাহার পাতা বার টেম্পাকর য়ারি, আপাঙর য়ারি, হিনচাপার য়ারি আদি।  আজিও ঔহানেছাৎ য়ারি বুললে য়ারিআলাগরে বেরি দিয়া মিকুপে পুলইতারা কনাক শৌ।  মাতানিও কিসাদে, নামাতিয়াও নার। য়ারি বুললে আমি বুজনর মনর ভিতরে ঘুমজিয়া আছি ঔ গুহাবাসি কনাক শৌগি খাংতা হজাক অয়া আজিও চংকরে ফালদিয়া মুংহানাৎ বহিতারা। পিছে পিছে বর্ণমালাল নানান ভাষাৎ ইকরানি অইল য়ারি। নানান পরিবর্তনর হাদিয়েদে য়ারিয়ে রূপ নিলগা গল্প বার উপন্যাসর। ঔতাও আদ্যেকার য়ারি নিজর মহিমাল আজিও পালয়া আছে। আজিও আমার মনহানিরে কির করে আসুলের। বর্ণমালাল পইলা ইকরা য়ারিহান মিশরর ‘আনপু বার বাতা’। হাইরোগ্লিফ লিপিল ইকরাহান।

গল্প

আজিকার বিষয়হান বিশেষ য়ারি আকতা যেতারে আমি গল্প বুলিয়ার। গল্পরে আমার ঠারে ‘হুরুয়ারি’ও বুলিয়ার। গল্প এহান কিহান? আক কথাৎ মাৎতে গেলেগা, গল্প আহান থিতি নাতা আহানাৎত আরাক থিতি নাতা আহানাৎ যাত্রা আহান। জ্ঞানীজনে মাতেছি – A short story is about the transition from an equilibrium state to another. The disturbance in the equilibrium is the subject matter of a short story. থিতি অয়া আছে চরিত্র আহানর জীবনে নানান, বাধা বিপত্তি যেবাকা আহের ঔবাকা চরিত্র ঔহানে সংগ্রাম করিয়া কিসাদে নিকুলিয়া আয়া বারো থিতি অর ঔহান পাঠকরে আকর্ষণ করের। ঔহানাতেই গল্প। মানু আগর জীবনর disturbance আহানে অন্য মানুরে কিয়া আকর্ষণ করের ঔহানেই মনোবিজ্ঞানর ডাঙর প্রশ্নহান। সহানুভুতি না আত্মদর্শন? বিয়ানে উঠিয়া বিমলে হবা করে ভাতপানি খেয়া অফিসে গেলগা, মাদানে হারৌ হারৌ অয়া আলয়া আহিল, মিনক বারো শৌগির লগে টিভি চেয়া ডাঙর মাছল পেটবুজে ভাত খেয়া ঘুমিজলগা – এসাদে দন্দ্ব নেই বিমলর stereotype জীবন আহানলো আরতা হাবি অইলেও গল্পতে নাইবছাৎ। দার্শনিক Neitzscheই মাতেছিল – One must have chaos to give birth to a dancing star. Chaos, disturbance বা বিশৃঙ্খলার আরাক পরিভাষা আহান entropy। সমাজ জীবনর, ব্যক্তি জীবনর বপ entropyর গর্ভৎত জ্বালা-যন্ত্রণার অগ্নিপথেদেহে বিশ্বসাহিত্যর উজ্জ্বল মণিমুকুতা জরম অছেতা।

 গল্প আহান কিতা কিতা উপাদানলো হঙরতা? গল্পর উপাদান বুললে মূলতঃ আমি হারপেয়ারতাঙই – থিম, পটভূমি, মুড, দন্দ্ব, কাঠাম, গতি, দৃষ্টিকোণ, চরিত্র সৃষ্টি, চিত্রকল্প রচনা, অলংকার আদি। হবা গল্পকার আগ অইতে গেলেগা এরে উপাদান এতা হারপেইলে হবা।

 থিম

থিম এতা আঠালি মাটি৷ জনম জনম ধরিয়া আছেতা- পহরিৎ, লপুকে, জংগলে- জীবনর নানা প্রান্তৎ৷ নুৱাতা কিৎতাও নেই৷ জীবনধারার পারগৎ বয়া, গল্পকারে এ মাটি লপহানাৎ লয়া রূপ দিলে অর প্লট বা  কাঠাম৷ রূপকার ঔগর দৃষ্টিকোণ বার কলা কৌশল ইলয়া থিম আকেইহানে লর তঙাল তঙাল রূপ৷ নিপুণ আতর পরশে বার অলংকরণে রূপ ঔহান অর অমর সৃষ্টি আহান৷

থিম এহান অইলতাই গল্প আহানর কেন্দ্রবিন্দুগ। এ কেন্দ্রবিন্দুগ যত স্পষ্ট অইতই তত গল্পহান মূর্তি পালইতই। থিম এহানে লেখক ঔগর জীবনদর্শনর সান্তা আহান দের। থিম এহানরে ফুলডালর নানগাছ বুলানিও য়াকরের। এ নান এগাছে বাকি উপাদান ঔতা গিঠে গিঠে ফুলডাল বানানি। থিম এহান পালাংগ, যেগৎ লেখকে পটভূমি, মুড, দন্দ্ব, কাঠাম, দৃষ্টিকোণ, চরিত্র, চিত্রকল্প, অলংকার আদি এতা তাপ্প য়ালকরেদেরতা। থিম এহান উপদেশ বা শিক্ষাহান নাগই। গল্প আহানাৎ উপদেশ বা শিক্ষা আহান থানি লাগতই বুলিয়া কুনো ডান্ডি নেই। থারতাই চিন্তার খুরাক আহান, পাকরিয়া লমনির পিছেও আবেশ আহান, নাপেলনি আহান। থিম এহান চিন্তাধারার মানস সরোবরগ।

গল্প এহানর উদ্দেশ্যহান কিহান? গল্প এহানর প্রতিপাদ্য বিষয়হান কিহান? জীবনর কিসাদে ধারণাহানরে গল্প এহানে সমর্থন করেরতা? জীবনর লু বারাহানাদে লুকেয়া আছে কিসাদে কথাহানরে গল্প এহানে মিঙালে আনানি মনারতা? গল্প আহান ইকরিয়া বা তামকরিয়া এসাদে সুৱাল করলে যে জুৱাবহানি পেয়ার ঔহানিতেই থিম এহানর ভ্রুণগ থার।

দন্দ্ব

দন্দ্ব এহান গল্পর মৌলিক উপাদান আহান। পরস্পর বিরোধী বলর আছুল-ঠেলা ঔহানেই দন্দ্বহান।  দন্দ্ব দুই নমুনার অইতে পারে –

(১) অন্তর্দন্দ্বঃ চরিত্র আহানর মনর ভিতরে পরস্পর বিরোধী বলর আছুল-ঠেলা এহান অন্তর্দন্দ্বহান। এহান আবেগিক বা মনোস্তাত্বিক দন্দ্বহান। ইন্দ্র কুমার সিংহর কালজয়ী গল্প ‘হুনার অরিঙি’র বাসকুলী বার ‘সতী’র কাদম হাঞ্চেপী  চরিত্র ঔহানি অন্তর্দন্দ্বর উৎকৃষ্ট উদাহরণহানি।

(২) বহির্দন্দ্বঃ অন্য চরিত্রর লগে, জীব জন্তুর লগে, প্রকৃতির লগে, সমাজর রীতিনীতির লগে চরিত্র আহানর সংগ্রাম এতা বহির্দন্দ্ব।

এরে পরস্পর বিরোধী বলর সন্তুলন করিয়া পাকরেকুরা এগরে পিছেদে কিহান অইলতা পিছেদে কিহান অইলতা এ নাতা এহানাৎ লমনি পেয়া পপকরে ধরিয়া থনি পারানি এহান গল্পকার আগর মাউসাৎ ক্ষমতাহান।

পটভূমি

গল্পহানর অকরাগতেই থার পটভূমি। স্থান কাল পাত্রর লগে পাকরেকুরাগর পরিচয় করে দেনা, গল্পহানর মুডগ, গতিহান সেট করে দেনা, এতাই পটভূমির উদ্দেশ্য। স্মৃতিকুমার সিংহর বরন ডাহেকুরি নাঙর গল্প এহানর অকরাগ চেইক –

‘ঋতুচক্র ইলয়া জার, বসন্ত, শৌকরা লালয়া বরিষার পর আহিল৷ প্রকৃতি শৃংগার লমকরিয়া পুরুষর সালেদে আকুল অইলি৷ অসহ্য অনন্ত প্রতীক্ষা৷ অম্বুবাসির দিনে রজ:স্ৱলা অছে ইমামাটি চিৎগ অয়া হাকহানাদে চেয়া বাসেয়া থাইলি৷ হারপাছেনাই, আর আর বছরর ঠৌনা এবছরও এ পর এহানাৎ নুৱা সৃষ্টিবীজল মেঘপু্ঞ্জর রূপহান ধরিয়া দক্ষিণেদেৎত পুরুষ আহিতই সইনেই৷ থাইনাকালেৎত নিয়ম নাবাগিয়া চলিয়া আহের প্রকৃতি-পুরুষর লীলাহান৷ থাঙও, এবছরতে মেঘালার দেহাদেহি নেই৷ বরনর ফুটাগির সালেদে বাসেইতে বাসেইতে খুমলর মাটি পাগলপারা অছে৷ ইমামাটি হুৎতুমেও পাগল অছেছাৎ৷ কুরু কুরু বুজে ধূলি লয়া অংগ অংগৎ গছিরি, বৌহানাৎ হিচিরি৷ আসাংপা বনলতাপাতাল থমথম করের তেইর চুলকাতা ধূলিময় জটা জটা৷ অবাধ্য গারিগর তাপহান ধূলিসিনান করিয়া চিক্করানির হন্নাহান এহান? না ধূলিরেনুল ইমামাটির শৃংগারহান? মাটিহানাৎত হ গজফৌ পেয়া ফামে ফামে ফরদের বৌবুলুনি৷ তুহুমে তুহুমেৎত নিকুলের আকুল তপ্তা প্রাথর্নাহান এহান? না, বিফল শয্যা হাজানির পিছে বাসকুলির ঠুনিংশাহান? যেহান অয়াও থাক৷ শিরই ফুলগ পারা খুমলতে আজি পুরেরনাইকো…’

শুভাশীষ সিংহ সমীরর  অত্যাধুনিক গল্পহান ‘মানু কিদিয়া লেহাউশপাৎ লাল্লাম ইতারাতা’ । ঔহানর অকরাগ এসাদে –

‘কালা কালা মেঘর হাদিৎত দলা কাবকর দেকি বরনর ফুটা শাতুয়া পড়ানি অকরল হান্তে, ধূলিয়ে বুজিছিল উঠান পথ হাবি হিনিয়া ঙক্‌খি-ঙারাল অনাৎ লেপুইলা হান্তে, ঘুমা ঘুমা আছিলা আসাংপা পাতা হাবি ভংগিপারেঙর মুদ্রানো নাছানি অকরলা হান্তে ‘একরল’ বুলিয়া কুঞ্জধন হুর্কা টর্চশৌ আগ ধরিয়া গরেৎত নিকুলিয়া আহিল।’

অকরাগর বাক্যগঠণ ঔহান বার কূপকরে চেইক। পাঠক এগও হান্তে…হান্তে… সিড়িহানাদে থাকে থাকে লামে লামে একরল বুলিল উঠানহানাৎ লামিয়া কুঞ্জধনর লগে লেহাউছপাদে আটানি অকরলপারা।

পিছেদে কিহান অইতই ঔহানর পূর্বাভাস আহান অনেক সময়ৎ গল্পহানর অকরাগৎ লুকেয়া থার। দক্ষ পাকরেকুরাই ঔহান বিসারেয়া লিকালা পারলে অকরাগতেই গল্পহানর মূল বিষয়বস্তুহান হারপেইতারা। স্মৃতিকুমার সিংহর ‘গুরুনি’ গল্প উহানর পইলা বাক্য বা pivotal sentence হানাৎ এসাদে পূর্বাভাস আহান আছে।

‘এরে বেলি হমানির পরে রোহিনীর বাহাছপার পিঠিৎ, গাঙর কাচা পথগর গজে মালট্রাক আহান উবা অয়া আছে –  বুড়িমার খজখজা মেইথঙে নুৱা আনকহানর সাদানে। ধূলিয়ে মতছে বাহার পাতাহানি থুরথুরি নিক্করের…’

বাহার পাতার থুরথুরি নিক্করানি এহান থক্ক আহিৎ নাপড়ের কিন্তুমান কূপকরে চেইলে হারপেয়ার এহান কতিহান অন্তর্ভেদি। আস্তা গল্পহানাৎ য়ারিজেলা রোহিনীর থুকথুকানিহান বাহার পাতাহানিয়ে পূর্বাভাস আহান দের।

গল্পহানর অকরাগৎ, মূলতঃ পটভূমিৎ, মুডগ লেইসি বারানি অর। মুড এগরে Spirit of the story বুলতারা। মুড এগই পরিবেশ আহান হংকরের- গল্পহানর অকরাগৎত লমনি পেয়া। ‘বরন ডাহেকুরি’ গল্প ঔহান পাকরলে দেহিয়ার প্রকৃতি বার পুরুষ, ইমামাটি বার মেঘালা, বরন ডাহেকুরি সাবী বার সরালেল এতাল সৃষ্টিধর্মী কৃষ্টি আহানর মুডগ গল্পহানর অকরাৎত লমনি পেয়া দেনার চেষ্টা করানি অছে।

 প্লট

প্লট এহানরে গল্প আহানর মূল কাঠামহান বা blue-print হান বুলানি য়াকরের। প্লট এহান ঘটনার পারেংহান। যে পারেংহানে দন্দ্বহানরে পটভূমিৎত থৌকরিয়া তাপ্প তাপ্প টেঙারাগদে কাকরিয়া চূড়াগৎ ফৌকরতইগা। পিছে চূড়াগৎত দন্দ্বহানরে সমাধানর নেমত্রিক উপত্যকাদে লামা লামা লমনির বেদে গতি করতই। প্লট আহানাৎ থার পাথাপহানি অইলতাইঃ অকরা, কানি, চি য়ৌঅনি বা ক্লাইমেক্স, লামানি বার লমনি। আগে মাৎলাং, গল্পহানর অকরাগৎ পটভূমিহান থার, মুডগ বার গতিহান সেট করানি অর। এতা বাদেও দন্দ্বহানর বীজগও অকরাগৎ থার। গল্পহান কাকেই কাকেই আগুৱেইতই মাহি দন্দ্বহান থাকে থাকে কানি অকরতই, লগে চরিত্র ঔতা মূর্তি পালনি অকরতই। দন্দ্বহান চি য়ৌঅইলে মাতিয়ার গল্পহান ক্লাইমেক্সহানাৎ ফৌঅইলগা। ক্লাইমেক্সহান চালাককরে ফৌঅইলেগা পাকরেকুরাগই আরাক ক্লাইমেক্স আহানর আশাল বাছেয়া থাইতই। ক্লাইমেক্সহান ঠিলইলে পাকরেকুরাগই অধর্য অয়া ঘর-মাংকল করতে থাইতই। ক্লাইমেক্সহান অইলতাই গল্পহানর চূড়াগ। চূড়াগৎ ফৌঅনির থাংনাৎ তাপ্প তাপ্প লামানি। এ পাথাপ এহানাৎ লেখকে গল্পহানাৎ উপস্থাপনা করেছে সমস্যা বার দন্দ্ব ঔতা সমাধানর বেদে লেইসি বারেইতই। লমনিহানাৎ দন্দ্ব ঔহানর সমাধান বা ঔহানর ইংগিত দিয়া গল্পহান লমইতই। লমনিহানাৎ লেখক আগই বাজিমাৎ করে পারের। পাকরেকুরাগরে তৃপ্তির ক্ষীরসাগরে অবগাহন করুৱা পারের। লমনিহান কৎত নমুনার অইতে পারে। চিরাচরিত নমুনা কতোহান তলে দেনা অইল –

(১) মুক্তঃ open-ended ; পাকরেকুরাগই অর্থহান নিকালতই, এ আশালো গল্পহান লমইতই।

(২) সমাপ্তঃ closed; টাংখেই শেংকরে লেখকে আকুবালা সমাপ্ত করে দেছে। পাঠকে আর খালকরিয়া     হিনপানিরতা নেই। আমার সিংহভাগ গল্পর লমনিহান এসাদে। যেমন, ইন্দ্রকুমার সিংহর ‘সতী’, ‘দলা চিঠি’, ‘আরি’ ইত্যাদি। লক্ষীন্দ্র সিংহর ‘গিরী’ৎ ব্রজোমোহনর মরনর লগে গল্পহানও লমছে। এ গল্প এহানাৎ আমার সমাজর মানুর চরিত্র আহান যেসাদে লেখকে সার্থক রূপ দেছে ঔহান উদাহরণ আহান অয়া থাইতই।

(৩)চক্রঃ cyclic; গল্পহানর অকরাগৎ আছিল অবস্থা ঔহান বারো আলয়া আহানি ঔহানাৎ গল্পহান

    লমইতই।

(৪) স্বগতঃ monologue; চরিত্রহানর স্বগ্তঃ উক্তি আহানল গল্পহান লমইতই।

(৫) কথ্যঃ dialogue; চরিত্র ঔতার কথাবার্তাল গল্পহান লমইতই।

(৬) আক্ষরিক চিত্রকল্পঃ literal image; ইজ্জুকরে অর্থ নিকালানি য়াকরব ঔসাদে চিত্রকল্প আগল গল্পহান লমনি। জ্যোতি প্রকাশর  ‘সঈদপুরর লপুকে’ গল্প ঔহানাৎ লমইতেগা লাগাদেনিরকা আনেছি লাবা ঔগি নির্বিকার অয়া শেইকুপ করানি বার দ্বিয়দাপার মুর ফুটাফুটি দেনি এসাদে ব্যংগাত্মক চিত্রকল্প আগল লমকরেছে ঔহান অপূর্ব অছে। গম্ভীর সামাজিক বিষয় আহানরে ব্যংগাত্মক উপস্থানাৎ জ্যোতি প্রকাশ দক্ষ শিল্পী আগ।

(৭) প্রতিকী চিত্রকল্পঃ symbolic image; আক্ষরিক অর্থৎতও দূরেইপা চিল অর্থ, পাকরেকুরাই নিকালানি য়াকরব ঔসাদে প্রতিকী চিত্রকল্প আগল গল্পহান লমনি।

ইন্দ্রকুমার সিংহর ‘সতী’, ‘আরি’ বার ‘হুনার অরিঙী’, ব্রজেন্দ্রকুমার সিংহর ‘লেইমাতল’, ‘সাঙা’, ‘পিতা স্বর্গ’ বার ‘ডাক্তরবাবুর শৌগ’, শ্যামানন্দ সিংহর ‘অজাবাবুলোক’, সমরজিৎ সিংহর ‘জগন্নাথ’ বার ‘হপন বার বাগা খিড়কি আহান’, অনুকূল সিংহর ‘কেথক’, ‘কাটা তারর গাঠুনি’ বার ‘টিকটিকি ঠিক ঠিক’, লক্ষীন্দ্র সিংহর ‘গিরী’ বার ‘বারপুৱার বিনি’, শান্তি সিংহর ‘হুনার কাঠিসুরি’ বার ‘মকরকুণ্ডল’, বিমল সিংহর ‘তম্বীসেনা মাঙইলিগা’, বিজয় সিংহর ‘অপরবি’ নিয়াম সংবেদনশীল সার্থক প্লটহানি। প্রভাসকান্তি সিংহর ‘বানাপানির সালে’  সংকলন ঔহানাৎ উচ্চমানর প্লটর উদাহরণ  কতোহান আছে ।

অত্যাধুনিক গল্পৎ প্লট নেয়র বুলিয়া অনেকগই নিংকরতারা। আসলে ঔহান নাগই। অত্যাধুনিক গল্পৎ শাস্ত্রীয় গল্পর সাদানে প্লটহান মেয়েক শেঙয়া নাথার। প্লটহান বিসারেয়া নিকালানির দায়িত্বহান লেখকে পাঠকর আতে এরেদের। প্লটহান গৌণ,  থিম বার স্টাইল মূখ্য অরছাৎ। মানু কিদিয়া লেহাউপাৎ লাল্লাম ইতারাতা অত্যাধুনিক গল্প আহান।  আমার কথাসাহিত্যর নিয়াম উন্নত অত্যাধুনিক গল্পর উদাহরণহান এ গল্প এহান।

 দৃষ্টিকোণ

গল্প আহান লেখকে উপস্থাপনা করেরতা দৃষ্টিকোণ আগৎত। লেখকে যে দৃষ্টিকোণগৎত গল্পহানর ঘটনাক্রম, চরিত্র বার তানুর কর্মকাণ্ড দেহুৱানি মনার পাকরেকুরাই ঔ দৃষ্টিকোণ ঔগৎতই গল্পহানর দৃশ্যকল্প ঔতা উপভোগ করতারা। ঔহানে দৃষ্টিকোণ এগর গুরুত্বহান নিয়াম। গল্পহান ইকরানির আগেই লেখকরতা দৃষ্টিকোণগ লেপকরানি লাগের। গল্প আহানর অকরাৎত লমনি পেয়া দৃষ্টিকোণগ আকগই থার। তলে ইকরা দৃষ্টকোণ এগি পৃথিবীর মোটামুটি হাবি গল্পৎ পেয়ারগি।

(১) উত্তম পুরুষঃ গল্প আহান উত্তম পুরুষ, মানে  মি বা আমি, এ দৃষ্টিকোণ এগৎত  উপস্থাপনা করানি অর। মূলতঃ মি। লেখকে নিজে উত্তম পুরুষে গল্পহানর বিররণ দিয়া দের। গল্পহানর ঘটনাক্রমর লেখক নিজে প্রত্যক্ষদর্শীগ বা অংশিদার চরিত্র আহান। অর্থাৎ, বিবরণকারি লেখক নিজে গল্পহানর মূখ্য, গৌণ না নিরব চরিত্র আহান। এ দৃষ্টিকোণ এগ নিয়াম প্রভাবশালীগ। লেখকর নিজর থতাৎত ব্যক্তিগত অভিজ্ঞতাহান সাকয়া গল্পহান নিকুলের হান্তে পাঠকে সেইক্ষাৎহান বুলিয়া নিংকরতারা। ঔহানে পাঠকর মনে গল্পহানর প্রভাবহান বার গ্রহণযোগ্যতাহান নিয়াম বাড়ের। স্মৃতিকুমারর ‘নাগরিক’ গল্প ঔহান উত্তম পুরুষ দৃষ্টিকোণেৎত ইকরাহান। লেখক শশরীরে  আন্দামান নিকোবর দ্বীপপুঞ্জৎ কুনোদিনও নাগেছেগা। গল্পহানর প্রয়োজনে গল্পহানর গবেষণাকালে ‘সাইবার ভিজিট’ করেছিলতা সিচ্চিল। এপেইৎ মাতানি হবা, শৌ আগ গর্ভধারণ করানিৎত ভূমিষ্ট অনা পেয়া যেসাদে সময় আহান লাগের, ঠিক ঔসাদে গল্প আহানর ধারণাহান মনহানাৎ গর্ভসঞ্চার অনির দিনেৎত গল্পহান ইকরানির দিনপেয়াও সময় আহান লাগের। ঔ সময় ঔহানরে গবেষণাকালহান বুলতারা। এ সময় এহানাৎ লেখকে গল্প এহানর গজে চিন্তন, মন্থন বার গবেষণা করের। অনেক গল্পর গবেষণাকালহান দিন আহান বা বেলা আহান পারা বাট্টি, অনেকহানরতা বছর আহান বা কৎত বছর অইতে পারে। নাগরিক গল্প ঔহানর গবেষণাকালহান প্রায় ছয় মাহা। অন্য দৃষ্টিকোণেৎত ইকরলে গল্প ঔহান এমাটিক হৃদয়গ্রাহী নাও অইলইছছাৎ।

(২) প্রথম পুরুষ (সীমিত)ঃ এ দৃষ্টিকোণ এগৎ লেখক নিজে গল্পহানর চরিত্র আহান নাগই। লেখক শিচ্চিল বিররণকারিগ। বিরবরণ করতইতা গল্পহানর কুনো চরিত্র আহানর দৃষ্টকোণেৎত – তা মাৎল, তেই কাদল এসাদে করে। লেখকে ভর করেছে ঔ বিশেষ চরিত্র ঔহান যেমন লেখকর  মুভি ক্যামেরাগ। ঔ ক্যামেরাগর ল্যান্সহানাৎ যেতা ধরানি অইতই ঔতাই লেখকে প্রথম পুরুষে বিবরণ বার বিশ্লেষণ করিয়া গল্পনাহাৎ তুলিয়া ধরতই। ল্যান্সহানার কভারেজর দুৱার ঘটনা বা পরিবেশ এ সীমিত দৃষ্টকোণেৎত ইকরা গল্পহানাৎ ধরা নাপড়তই। আরাক কথা আহান, লেখকে ভর করা চরিত্র ঔহান সময় আকহানাৎ ফাম আকহানাৎহে বিরাজ করানি পারেরতা। ঔহানে লেখকও ঔ ফাম ঔহানরহে ঔ সময়র ঘটনার বা পরিবেশর বিবরণহে দেনি পারতইতা।

(৩) প্রথম পুরুষ (সর্বত্র বিরাজমান)ঃ এ দৃষ্টিকোণ এগতও লেখক নিজে গল্পহানর চরিত্র আহান নাগই, শিচ্চিল বিররণকারিগ। তা মাৎল, তেই কাদল এসাদে করে বিবরণ করলেও কিন্তু বিরবরণ করতইতা গল্পহানর কুনো চরিত্র আহানর দৃষ্টকোণেৎত নাগই। এ দৃষ্টিকোণে লেখক সর্বজ্ঞ বার সর্বত্র বিরাজমানগ। লেখক হাবি চরিত্রর মনর ভিতরে হমা পারের, হাবি ঘটনা আকসাটে দেহে পারের, সময় আকহানাৎ কৎতহান ফামে বিরাজ করানি পারের। পৃথিবীর সিংহভাগ গল্প এ দৃষ্টিকোণেৎত ইকরাতা। ব্রজেন্দ্র কুমার সিংহর লেইমাতল, সাঙা, লয়নির ফাল্গুনে, কৌলি এ দৃষ্টিকোণেৎত ইকরা আমার সাহিত্যর অপূর্ব নিদর্শনহানি।

অনেক গল্প বার উপন্যাস আছে যেতা মধ্যম বা দ্বিতীয় পুরুষ (তি, তুমি) দৃষ্টিকোণ এগৎত ইকরানি অছে। অবশ্য এসাদে ইকরা গল্প বা উপন্যাস নিয়াম আহিৎ নাপড়ের। এবাকার বাংলা লেখিকা সুচিত্রা ভট্টাচার্যর ‘মন্থন’ উপন্যাস ঔহান মধ্যম পুরুষ দৃষ্টিকোণেৎত ইকরাহান।

চরিত্র সৃষ্টি

চরিত্র সৃষ্টি গল্পকার আগর হাবিৎত ডাঙর চ্যালেঞ্জহান। ছেয়া ছেয়া চরিত্রর হাদিয়েদে গল্পকার ঔগরে পাঠকে দেহানি পারানি মানে চরিত্র সৃষ্টিৎ লেখকগ সার্থক নাছে। অর্থাৎ গল্পহানর চরিত্র ঔতা বিশ্লেষণ করিয়া পাঠকে যদি লেপকরানি পারের লেখক নারীগ না পুরুষগ, বুজনগ না কনাকগ, কংগ্রেসিগ, কমিউনিস্টগ না বিজেপিগ, হিন্দুগ, খ্রিস্টিয়ানগ না মুসলমানগ, ঔতাইলে হারপানি লেখকে নিজরে লুকানি নুৱারেছে, চরিত্র ঔতাৎ নিজরে জাহির করেছে, মোটকথা সৃষ্টি করানি অছে চরিত্র ঔতা কুনো না কুনো বারা আহানাৎ সলছে।

 চরিত্রতে কিসাদে সৃষ্টি করানি? গল্পহানাৎ লেখকে চরিত্র আহান সৃষ্টি করেরতা চারিহান উপাদানলঃ

(১) কথাঃ চরিত্র ঔহানে কিতা কিতা কথা টটরার, কিসাদে টটরার।

(২) কামঃ চরিত্র ঔহানে কিতা কিতা কাম করের, কিসাদে করের।

(৩) চিন্তাঃ কথা বার কামে চরিত্র ঔহানর চিন্তাধারা প্রকাশ অইলেও অনেক সময়ৎ চরিত্র ঔহানে কিতা চিন্তা করের ঔহান বিবরণ করানি অর।

(৪) বিবরণঃ চরিত্র ঔহানে কিসাদে টটরার, কিসাদে কাম করের ঔ বিবরণ বাদেও চরিত্র ঔহান চেইতে কিসাদে – ডিগল-ডাঙর, কালা-দলা, টটরতে পিচুম দ্বগি থেংনা দের – এসাদে অবয়ব, কিসাদে ফুতি পিদেছে এতার বিবরণ আদি।

(৫) অন্যর মন্তব্যঃ অন্য চরিত্র ঔতাই এ চরিত্র এহান সম্বন্ধে কিতা কিতা মাৎতারা ঔতার মাধ্যমেও চরিত্র ঔহানর গুণাবলি ফুটিয়া উঠের।

শংখলেইমা নিয়াম সরলা বুড়িমাগ – এসাদে পারেং আহানল  লেখকে তুমসাম পাঠকরাং শংখলেইমার গুণ ঔহানর বিবরণ ফৌকরে পারের। অনভিজ্ঞ লেখকে এসাদেই চরিত্র রূপায়ণ করতারাতা। কিন্তুমান লেখকে নামাতিয়াও গল্পহানাৎ শংখলেইমার কথাবার্তা, কামকাজ আদি পাকরিয়া যে কুনো পাঠকে তেই সরলাগ এ সিদ্ধান্ত এহানাৎ ফৌঅনি পারলেহে সার্থক চরিত্র সৃষ্টিনাই। এহানাতেই অভিজ্ঞ গল্পকারর দক্ষতার পরিচয়হান। ইন্দ্রকুমার সিংহর ‘আরি’ গল্পর বরমংগল বার ‘সতী’র কাদম হাঞ্চেপী, ব্রজেন্দ্র কুমার সিংহর লেইমাতল গল্পর ‘লেইমাতল’,  লক্ষীন্দ্র সিংহর ‘বারপুৱার বিনি’  অপূর্ব চরিত্রহানি।

 চরিত্রর প্রকারভেদ

গল্প আহানাৎ মূল চরিত্র আহান থার যেহানরে protagonist বুলতারা। মূল চরিত্রহানর বিরোধিতা করিয়া দন্দ্বর সৃষ্টি করতারা চরিত্র ঔতা antagonist। বিরোধী শক্তি ঔহান সিচ্চিল চরিত্রই নাগই প্রকৃতি, পরিবেশ বা সমাজ ব্যবস্থাও অইতে পারে। এতা বাদেও গল্পহানর প্রয়োজনে আরাকও পার্শ বা বারার চরিত্রও থাইতে পারে যেতাই protagonist চরিত্ররে পাংকরতাই নাইলে বিরোধিতা করতাই। একেবারে দরকারি চরিত্র ঔহানি যেহানিয়ে গল্পহানর থিমহানরে পরিস্ফুট করতাই ঔহানে শিচ্চিল থানি। নিয়াম চরিত্রই বার অদরকারি চরিত্রই থিমহানরে পানিসানিহে করের। সার্থক চরিত্র আকেইহানে গল্পহানাৎ নুৱা মাত্রা আকেইহান করে বপকরে দের। গল্প আহানাৎ য়ৌঅর চরিত্র ঔতা নানান নমুনারতা অইতে পারে। গল্পহানর পরিসীমার ভিতরে চরিত্র আহানর স্বভাব, চরিত্র, চিন্তাধারা আদি গুণর পরিবর্তন অইলে অর্থাৎ এসাদে পরিবর্তনর মাধ্যমে চরিত্র ঔহানর পরিবর্ধন অইলে ঔ নমুনার চরিত্র ঔতারে গতিশীল চরিত্র বুলতারা। ব্রজেন্দ্র কুমারর সিংহর লেইমাতল চরিত্র ঔহান গতিশীল চরিত্রর অপূর্ব নমুনাহান। গল্পহানর অকরাৎত লমনি পেয়া  চরিত্র আহানর গুণর কুনো পরিবর্তন নাইলে ঔ চরিত্র ঔহান স্থায়ী চরিত্রহান। আহান দুহান সীমিত গুণাবলিল হঙর চরিত্র আহান, যেহান বাক্য কতোহানাৎ বিরবরণ করিয়া লমর ঔসাদে চরিত্ররে গৌণ চরিত্র বুলতারা। গৌণ চরিত্র এতা মূখ্য চরিত্ররে মূর্তি পালকরানিরকা গল্প আহানাৎ অনেক সময়ৎ প্রয়োজন অর, বারার চরিত্র হিসাবে।

 চিত্রকল্প রচনা

চিত্রকল্প রচনা মানে পাঠকর মনহানাৎ কাল্পনিক চিত্র আগ রচনা করানি। চিত্রকল্প রচনা গল্প আহানর মূল অংগ আগ বুলানি য়াকরের। গল্পহানাৎ ব্যবহার করানি অছে শব্দ বার বাক্য ঔতাল পাঠকর পঞ্চ ইন্দ্রিয় (আহি, কাণ, নাক, জু বার চাম) হজাক করুৱেয়া অনুভূতির মাধ্যমে পাঠকর মনহানাৎ সেইক্ষাৎ চিত্র আগ রচনা করানি পারানি। ঔহানে চিত্রকল্প বুলতে সিচ্চিল আহিল দেহিল সেইক্ষাৎ স্থিরচিত্র নাগই, সিনেমাহানর সাদানে ধ্বনিময় অনুভূতিময় চলচিত্রহান বুললেহে খানিমানি হারপানি পারিয়ার। ঔহানে মাতে পারিয়ার গল্প আহানাৎ চিত্রকল্পর ভূমিকাহান অইলতাই পাঠকর মানসপটে গল্পহানর বিষয়বস্তু, ঘটনাক্রম, চরিত্র আদিরেল সংবেদনশীল প্রকাশকল্প আহান প্রোজেক্ট করানি। চিত্রকল্প রচনার আরাক ভূমিকা আহান অইলতাই গল্পহানরে অলংকার পিদাদিৱেয়া আরাকও আকর্ষনীয় করানি।

গল্পকার আগর ডাঙর চ্যালেঞ্জহান অইলাই চিত্রকল্প রচনারকা তার আতে আর কিৎতাও নেই, সিচ্চিল শব্দ কতগ বাদে। ঔ শব্দ ঔতার সঠিক ব্যবহারল পঞ্চ ইন্দ্রিয়র অনুভূতি পাঠকর মনে ফৌকরে পারানি গেটি খেলানির কথাহান নাগই।

বর্ণমালাল ইকরা যে কুনো ভাষা আহানর শব্দ ঔতারে বিশেষ্য, বিশেষণ, ক্রিয়া, সর্বনাম এসাদে নানান বাক্যপদে (Parts of speech) ভাগ করানি পারিয়ার। ঠিক ঔসাদে, চিত্রকল্প রচনারতাও ভাষা আহান আছে, চিত্রমালা আহান আছে। চ্রিত্র ঔতারে অলংকার (figures of speech) বুলতারা। অলংকার দুই প্রকারঃ শব্দালংকার বার অর্থালংকার। মূল শব্দালংকার অইলতাই – অনুপ্রাস, যমক, শ্লেষ ইত্যাদি। মূল অর্থালংকার অইলতাই – উপমা, রূপক, উৎপ্রেক্ষা, অতিশয়োক্তি, মানবীকরণ ইত্যাদি। বাক্য আহানার শব্দ ঔতাৎ ধ্বনি আগর, মূলতঃ ব্যঞ্জন ধ্বনির, পুনরাবৃত্তি অইলে অনুপ্রাসর সৃষ্টি অর। বাক্য আহানাৎ শব্দ আকগ দ্বিফির বা ঔতাৎতও নিয়াম ব্যবহার অর বার ব্যবহারহান লেহে অর্থহান তঙাল অর ঔতাইলে অর যমক অলংকার। শব্দ আগ আকফিরেই ব্যবহার অইতই কিন্তুমান অনেক অর্থ বহন করলে অর শ্লেষ। আধুনিক কবির ‘গিথানক’। এপেইত গিথানক বুলতে কবির মিনক, কাব্য প্রতিমা বা মিউজ্‌, আরাধ্য দেবী এসাদে কৎতহান অর্থ বুঝেইতে পারে। এহান শ্লেষহান। শব্দালংকার মূলতঃ কবিতাতেই নিয়াম ব্যবহার অর। কথাসাহিত্যৎ অর্থালংকারেই নিয়াম ব্যবহার অর। কুনো বস্তু বা প্রাণী আগর তুলনা নিয়াম তিল অন্য বস্তু বা প্রাণী আগর লগে করানি অইলে উপমা অলংকার অর। উপমা আহানারতা চারিহান অংগ থার – উপমেয় (যেগর উপমা দেনা অর), উপমান (যেগর লগে উপমেয়র তুলনা করানি অর), সাধারণ ধর্ম (উপমেয় বার উপমানর মা বর্তমান সাধারণ গুণ বা ধর্ম) বার বাচক শব্দ (সাদানে, ডেকি, ঠৌনা)। জুনাকহানর সাদানে কঙালা বার ঙাল মেইথংহান। গুণাবলী চানাপ্পা সমান অনির সালে উপমেয়গৎ উপমানর আরোপ অইলে রূপক অলংকার অর। জুনাকসাদিনী, কুরংগনয়নী, চরণকমল। এপেইৎ বাচক শব্দ আর নেয়র। সমানতার কারণে উপমেয়গৎ উপমানর সম্ভাবনা বা কল্পনা করলে অর উৎপ্রেক্ষা। গারিগ যেমন হুতার ডলাগ। জড় বা অচেতন বস্তু আহানর গজে মানবীয় ভাব, আবেগ, ক্রিয়া-কলাপ আরোপ করিয়া টেইপাং মানুগ করে দেহুৱেইলে মানবীকরণ অলংকার অর। লোক-সাহিত্যৎ এহানর ব্যবহার নিয়াম। বাহারপাতা বার টেম্পাকর য়ারিহান পাকরিক। অলংকার এতা হাবি হঙরতা বাক্যপদ এতাৎত। এতা সাহিত্যর অলংকার শাস্ত্রৎ বিস্তৃত পেয়ার। আমার আগেকার পণ্ডিত গিরিগিথানিয়ে অলংকার শাস্ত্র সৈনায়া তামকরলা। আমার নাংপাল্পা কবি সাহিত্যিকে এ বিষয়ে ইকরেছি বার আশা করুরি আরাকও ইকরতাই হান্তে মি আর ডিগল নাকরলু।

 নবিশ চিত্রকার আগরে চিত্র আগ, যেমন আহিয়া আছে নিঙল আগর মেইথংহান আকানিৎ দিলে চিন ঔতা সম্পূর্ণ করিয়া চিত্র ঔগ আকের। দক্ষ চিত্রকার আগই কিন্তু অসম্পূর্ণ খাচ কতহানল সম্পূর্ণ চিত্র আগ অবিকল আকের। হাদিৎ ফাম এরেদিয়া এরেদিয়া দক্ষ চিত্রকারে খাচ কতোহান অনথকপা আকপেইৎ অনথকপা আকসাদে দিতই নিঙল ঔগ ভাবে রূপে অবিকলগ অইতই। খাচর হাদির উদালা ফাম ঔতা চিত্র চাকুরাগই কল্পনাল পূরণ করিয়া অবিকল চিত্র আগ পার। ঔসাদে করিয়া চিত্র-দর্শকে অসম্পূর্ণ চিত্র ঔগ নিজর কল্পনাল পূর্ণ করিয়া, চিত্র-রচনাৎ য়ৌঅনি পারিয়া আরাক নান্দনিক আনন্দ আহান উপভোগ করতারা। ঠিক ঔসাদে, পইলা পইলা গল্প ইকরের লেখকে বাক্যপদল, অলংকারল, বিস্তৃত বিরবরণল সম্পূর্ণ চিত্রকল্প আগ রচনা করানির হন্না করের। পাঠকর সৃষ্টিশীল কল্পনারকা বিন্দু আহান ফাম এরা নাদের। দক্ষ গল্পকারে কিন্তুমান চিত্রকল্প রচনা করতে ঔনাপা ফামে নিজে চিত্র রচনা করিয়া পাঠকর সৃষ্টিশীল কল্পনার সালেদে বাকি ফাম এরেদে এরেদে যারগা। এসাদে গল্পর পাঠক সৃষ্টিকর্ম এহানাৎ য়ৌঅনি পারিয়া আরাক মাত্রা আহানর নান্দনিক আনন্দ আহান পেইতারা। এহানরে partipatory story writing বুলবাং নাকিতা?

আরাক কথা আহান, গল্পকারে গল্প আহান ইকরেরতা নিজর দখল হবা প্রাকৃতিক ভাষা আহানাৎ, ইংরাজি, বাংলা, অসমীয়া, বিষ্ণুপ্রিয়া মণিপুরী ইত্যাদি। ঔমতে আমি ইংরাজি, বাংলা, অসমীয়া বা বিষ্ণুপ্রিয়া মণিপুরী গল্প বার গল্পকার ঔগরে ইংরাজি গল্পকার, বাংলা গল্পকার বুলিয়ারতা। এহান সামাজিক পরিচয় পত্র রচনার উপাদান আহানর কাম করের। উত্তম গল্প আহানল, গল্প কতোহানল বা গল্পকার আগল ঔ ভাষাভাষি সমাজ গর্বল জগৎ সভাৎ বুক ফুলেয়া উবা অনি পারতারা, লেইচন্দন পেইতারা। কিন্তু সাহিত্যিক আগর সাহিত্য সৃষ্টি সামাজিক পরিচয় রচনার গণ্ডিগৎ সীমাবদ্ধ নাথার। তার সারা জীবনর হপন আহান থারতাই তা ভর করেছে প্রাকৃতিক ভাষা ঔহানর বাক্যপদ ঔতাল মৌলিক অলংকার রচনা করিয়া ঔতাল নিজর চৈত্রিক ভাষা আহানর সৃষ্টি করানি। আঙুলিৎ লেহা কতোগ কবি-সাহিত্যিকেহে এসাদে নিজর চৈত্রিক ভাষা সৃষ্টি করানি পারেছিতা। পারেছি আরহে তানু উত্তম কবি-সাহিত্যিক। যেমন, মঁপাসা, চেকভ, মার্কুয়েজ, রবীন্দ্রনাথ, নজরুল, কমল কুমার মজুমদার, ভবেন্দ্রনাথ শইকিয়া, সৌরভ চালিহা আদি। রবীন্দ্রনাথ বার কমল কুমার মজুমদারর ভিত্তি ভাষাহান বাংলা কিন্তু তানুর নিজর চৈত্রিক ভাষাহানি একেবারে তঙাল। ভবেন্দ্রনাথ শইকিয়া বার সৌরভ চালিহার ভিত্তি ভাষাহান অসমীয়া কিন্তু তানুর চৈত্রিক ভাষাহানি একেবারে তঙাল। সিচ্চিল তিরিশ হাজার শব্দ চুৱাল হঙছে বিষ্ণুপ্রিয়া মণিপুরী ভাষার গজে ভিত্তি করিয়া এবাকা পেয়া নিজর চৈত্রিক ভাষা সৃষ্টি করানি পারেছিতা, মোর বিচারে দুগই – ব্রজেন্দ্র কুমার সিংহ বার সেনারূপ সিংহ। স্মৃতিকুমারে আজি পয়ত্রিশ বছর গল্প ইকরিয়াও নিজর চৈত্রিক ভাষা আহান সৃষ্টি করানি নুৱারেছে – এহানে লেখকর হাবিৎত ডাঙর ব্যর্থতাহান।

 গল্পর বৈশিষ্ট্য

গল্পর মূল বৈশিষ্ট্যহান অইলতাই গতি।  অকরাগৎ গল্পহানে যে গতিহান পিক্‌ আপ করতই ঔ গতি ঔহান বজায় থয়া গল্পহান লমইতই। অর্থাৎ কারগর সাদানে অকরাগৎত লমনি পেয়া গতি আহানাল গিয়া লক্ষ্যভেদ করানি। তাপ গতিল গল্পহান অকরলে তাপ গতিল লমনি, ত্বরাল অইলে ত্বরা। স্মৃতিকুমারর ‘পলাঙ’ নাঙর গল্প ঔহান ত্বরা গতির পরীক্ষাহান। ‘সময় নেই, সময় নেই হাবি উরাদারা অছি। এ স্টেশনর লমইলগা ট্রেনহান প্লাটফর্মে উবায়া আছে। এব্বাকা এরে দিতই… ’ গল্প এহানাৎ ট্রেনর যাত্রি, স্টেশন মাস্টর, টিকেট কাউন্টারর মানু, চাহা বার কোল্ড-ড্রিঙ্কসর হকার, আকগরতাও সময় নেই। প্লাটফর্মে মরণ ফাঙছে বেয়াপা ঔগর বুকর আড়র পলাঙে লেইলেক অয়া হমা পড়েছেগা, এব্বাকাপারা নিকুলতই, ঠই ঔগরতাও সময় নেই। হাবি উরাদারা অছি। ত্বরা গতির গল্প আহানাৎ লেখক আগরতা ডিটেলিঙর সময় নেয়র, যেসাদে তাপ গতির গল্পৎ থার। স্মৃতিকুমারর ‘সাড়ে তিন আত হপন’ গল্প ঔহান তাপ গতির গল্পহান। গতি এহানেতেই গল্প আহান উপন্যাস আহানাৎত তঙাল অরতা। উপন্যাস আহানাৎ গতিল এমাটিক ডান্ডি নেই। উপন্যাস আহানার অকরাগৎ গতিহান তাপ, হাদিৎ ত্বরা, বার তাপ, বার ত্বরা এসাদে অইতে পারে। ঔহান বাদেও, উপন্যাস আহানাৎ কৎতহান সমান্তরাল ঘটনাক্রম থাইতে পারে; গল্প আহানাৎ কিন্তুমান আকহান ঘটনাক্রম থার।

নুৱা দৃষ্টি, নুৱা চিন্তা আহান পাকরেকুরাই গল্পহানাৎত পানা এহান গল্পর বৈশিষ্ট আহান। alternativization এহান শিচ্চিল গল্পর নাগই, সাহিত্যর আর আর ডাল উতারতাও মূল বৈশিষ্ট্য আহান।

উপন্যাসর সাদানে গল্পৎ স্বাধীনতা কম। নানান সীমারেখার ভিতরে গল্প আহানর বিচরণভূমিহান, সার্থক গল্পর চ্যালেঞ্জহান, গল্প লেখকর সামর্থর পরিচয়হান। মূল সীমারেখাহান অইলতাই শব্দসীমা। গল্প আহান পারিল মাহি, মনেইল মাহি ডিগল করানি নার। স্টান্ডার্ড গল্প আহান মোটামুটি পাচ হাজার শব্দর কম বা খানি নিয়াম অর। গল্পহানর থিম, প্লট, চরিত্র আদি মূর্তি পালকরতে সহায় নাকরব শব্দ ঔতার ফাম গল্পৎ নেই। গল্প এহান ষোল বছরর নিঙলগর সাদানে প্রাণঞ্চল, চিকন। লাহুল মেদর নাংসাদ নেই। শব্দসীমার পিছেকার সীমারেখাহান কালসীমা । প্রায় গল্পর ঘটনা এতা মাৎতে গেলেগা বেলা আহানর, দিন আহানর বা কতোদিনর ভিতরে সীমাবদ্ধ। ঔতা বুলিয়া আঠার দিনর ঘটনাপ্রবাহল, লক্ষ লক্ষ শব্দল ইকরা মহাভারতর য়ারিহানরে গল্পহান বুলানিহান নাগই। কালর (time) থাংনাৎ আহেরতাই স্থানসীমা, পাত্রসীমা বার ঘটনাসীমার কথা। গল্প আহানাৎ নিয়াম পারা স্থান (location), অদরকারি পাত্র (character) বার নিয়ামপারা ঘটনা (event) থাইলে আর গল্পহান অয়া নাথার, উপন্যাসর বেদেহে কাতিরা অর। কতিগ শব্দ, কতিহান কাল, কইহান স্থান, পাত্র বার ঘটনা থাইলে গল্প আহান অইতইতা বুলিয়া আংকরলে উত্তর দেনা চিল।  এ সীমারেখা এতার নির্দিষ্ট সাংখ্যিক পরিমান ঔহানাৎত উদ্দেশ্য ঔহানে নিয়াম গুরুত্বপূর্ণ। গল্পর উদ্দেশ্যহান অইলতাই শব্দ, স্থান, কাল, পাত্র, বার ঘটনার সাদানে মূল্যবান সম্পদ এতা নিয়াম চেকচিল অয়া ব্যবহার করিয়া নিয়ন্ত্রিত গতির নুৱা দৃষ্টির নুৱা চিন্তার চিকন প্রকাশকল্প আহান পাঠকরে খুৎতল দেনি। অর্থাৎ গল্পর মূল বৈশিষ্ট্যহান অইলতাই economy – economy of words, locations, time, characters and events.

 গল্পর কৌশল

মাতানিতে মাৎলু মূল বৈশিষ্টহান অইলতাই গতি। গতি নিয়ন্ত্রণ করানি এহানেই গল্পকার আগর ডাঙর কামহান। কিন্তু কিসাদেতে গতি নিয়ন্ত্রণ করানি? কৌশলহান কিহান? গল্প এহানরে হুরকাং গাড়িহান বুলিয়া নিংকরলে, গিয়ারগতে কিগ, যেগলো গতি নিয়ন্ত্রণ করানি অইতই? গল্পর গিয়ারগ অইলতাই বাক্যর ডিগালিহান। বাট্টি বাট্টি সরল বাক্য বা বাক্যাংশল গল্পহান ইকরলে ত্বরা গতির বার ডিগল ডিগল বাক্যল, সরল বা যৌগিক, ইকরলে তাপ গতির গল্পহান অইতই। সমরজিৎ সিংহর ‘জগন্নাথ’ গল্প ঔহান এসাদে বাট্টি বাট্টি সরল বাক্য বা বাক্যাংশল ইকরা ত্বরা গতির সার্থক গল্পহান। সমরজিৎ সিংহর ‘হপন বার বাগা খিড়কি আহান’ গল্প ঔহান আমার সাহিত্যৎ মনস্তাত্তিক বিশ্লেষণর অপূর্ব নমুনা আহান। সময় থাইতে গিরকর গল্প সংকলন আহানর ব্যবস্থা নাকরলে এসাদে মূল্যবান গল্প এতা চিরদিনকারকা মাঙয়া যানির ডর আছে। কুনো গিরক আগই বা সংস্থা আহানে দায়িত্বহান নিলেগা হবা।

গল্পর কালসীমা ঔহানর ভিতরে থায়া নিয়ম নাবাগিয়া সীমাগ ঠেলা দেনির কৌশল ঔহানর নাং ফ্লাশব্যাক। গল্পহানাৎ চলেছে বর্তমান সময় প্রবাহ ঔহানাৎত স্মৃতি রোমন্থনরে ভর করিয়া অতীতর ঘটনাক্রম আহানাৎ বিচরণ করিয়া বার বর্তমান সময় প্রবাহ ঔহানাৎ আলয়া আহানি ঔহান ফ্লাশব্যাকর মূল কথাহান।  ব্রজেন্দ্র কুমার সিংহর ‘লয়নির ফাল্গুনে’ গল্প ঔহানাৎ বর্তমান বার অতীতর বানাবানির অপূর্ব নমুনা আহান আমি পেয়ার। স্মৃতিকুমার সিংহর ‘মেস্তরি ধ্বজোর মরণ’ গল্প ঔহানর পইলা পাথাপ ঔহান চানাপা ফ্লাশব্যাকহান, ধ্বজোর কনাকেৎত শৌর বাপক অনা পেয়া ডিগল সময় এহানর পুরানা স্মৃতির কলাজ্‌ আহান। নিয়াম ডিগল ফ্লাশব্যাক বার ঘনে ঘনে ফ্লাশব্যাক গল্পহানর স্বাভাবিক গতিহানরে মাংকরে দের।

চিত্রকল্প রচনা করতে গল্পকার আগরতা নিয়াম সিঙনি থকর। নানান গল্পৎ, কবিতাৎ আর আর ইকরাৎ ব্যবহার অইতে অইতে পুরানা অছে, তেনা তেনা অছে উপমা বার রূপক অলংকার ব্যবহার নাকরানি। এসাদে পুরানা অলংকার এতারে ক্লিশে বুলতারা। বিশেষণ, ক্রিয়া বিশেষণ এতাও ক্লিশে। দীক্ষিত পাঠক আগই গল্পহান পাকরিয়া  ক্লিশে পানা অকরলে হাতে হাতে অতৃপ্ত অনা অকরের। অইতে অইতে গল্পহানর লমনি পেয়া ফৌঅনি নুৱারিয়া আধাপথে খামর। এগদে বার এসাদে গল্পর লেখক নিজর চৈত্রিক ভাষা সৃষ্টিৎ ব্যর্থ অর। নুৱা নুৱা উপমা বার রূপকে গল্পহানরে আরাকৌ ঙালকরের। ঔহানে নুৱা নুৱা উপমা বার রূপক সৃষ্টি গল্পকার আগর নিত্যিকার সাধনাহান অনা থক। আরাক কথা আহান আগেও মাৎলু, বার মাতুরি, সম্পূর্ণ চিত্রগ না আকানি। চিত্রকল্প রচনা করতে পাকরেকুরাই কল্পনালো চিত্রগ সম্পূর্ণ করানির ফাম এরে দেনি। পারিল মাহি বাস্তব চিত্র আকানি।

গল্প এহান পরীক্ষার খাতাৎ ইকরিয়ার সারাংশহান নাগই। সারাংশ না ইকরিয়া দৃশ্য ইকরানি। য়ারিহান নাদানি, য়ারিহান দেহুৱানি। ইকরা গল্প আহান মেয়েকর পারেং আহান। যেমন কম্প্যাক্ট ডিস্কহানাৎ (CD) বিট্‌ বাইটর পারেংহান অয়া পুলয়া আছে সিনেমাহান। পাঠকে চামর আহিগিল পারেং এহানি এমুরেৎ হৌমুরে পাকরিয়া যিতেগা সিনেমাহানর সাদানে তার মনর পর্দাহানাৎ চিত্রমালা বা দৃশ্য ঔতা মনর আহিগিল দেহানি, ধ্বনিময়তা ঔহান কানহানিল হুনানি, ফুলর নুংশি বার ড্রেনর পচা গৎ ঔতা নাকগৎ বারি দেনা, খানাপিনার বস্তুর হুৱাৎ ঔতা সেইক্ষাৎ করে জুহানাৎ লাগানি বার  গল্পহানাৎ আছে উরর শৌগর বার নিঙল ঔগর কঙালা চামর নান ঔহান, দাড়ি নাখুরাছে নায়ক ঔগর পিস্‌পিসানি ঔহান আঙুলির আগাগিল, আতর তারাহানিল, কঙালা গালগিল অনুভব করানি। ঔসাদে অইলেহে সার্থক গল্পনাই।

গল্প আহানাৎ surprise value নিয়াম অনি shock value কমনি। পারলেতে গল্পহান shock valueর গজে ভর নাকরানি। surprise value বুলতে মি মাতানি মনাউরিতাই, গল্প এহান পাকরিয়া পাঠকে হপনেদেও নাখালকরেছে অপ্রত্যাশিত নুৱা আনন্দ আহান,  জীবনর নুৱা রহস্য আহান, নুৱা অনুভুতি আহান পানি। shock value বুলতে যেমন গল্পহানর মূল চরিত্র ঔহান হারৌ হারৌ অয়া ঘরে আলয়া আইতে পেইরাক গাড়ি এক্সিডেন্ট আহানাৎ মারে দিয়া গল্পকারে করুণ রস আহান সৃষ্টির হন্না করানি। হুকানা ফুতি আহান চিপিয়া বল্লে পানি নিকালানির সাদানে কামহান এহান। পইলা পইলা গল্প ইকরতারা লেখক ঔতাই shock valueর গজে ভর করানি নিয়াম মনেইতারা। স্মৃতিকুমারর পইলা গল্পহান ‘কেথকপী’। পুল্লাপে shock valueর গজে ভর করিয়া ইকরা অপরিণত গল্পহান।

 লেখকর ভূমিকা

এতাহাবি রীতিনীতি হারপানির পিছেদে, হিকানির পিছেদে গল্প ইকরানি বুলিয়ারতানা কিতা? কিসাদে লেখকগই এতা হাবির কোর্স করিয়া গল্পকারগ অছেগ মাতিকতা? এসাদে প্রশ্ন আহান মনে আহানি স্বাভাবিকহান। গল্পর রীতিনীতি হাবি হারপেয়া পিছেদে গল্প ইকরানিৎ কুনোগও নাবহিতারা। চেকভর, টলস্তয়র, এডগার এলেন্‌ পোর, শরৎচন্দ্রর, রবীন্দ্রনাথর, কমল কুমার মজুমদারর, স্বপ্নময় চক্রবর্তির, ভবেন্দ্রনাথ শইকিয়ার, সৌরভ চালিহার, ইন্দ্র কুমারর, ব্রজেন্দ্র কুমারর গল্প পাকরিয়া, ঔ গল্প ঔতারে আদর্শ নমুনাহানি ধরিয়া অবিকল ঔসাদে গল্প ইকরানির চেষ্টা করতে করতে নুৱা গল্পকার আগ জরম অর। লুকরে খালকরলে পেইতাঙাই এসাদে সার্থক গল্পকারর কালজয়ী গল্পৎ মাতিয়ার রীতিনীতি এতা হাবি আছে। হবা গল্প পাকরতে পাকরতে, গল্পল সানা করতে করতে গল্পর গোপন রহস্য, বৈশিষ্ট নিজর অজান্তে নুৱা গল্পকারে আয়ত্ব করে বেলার। এহানও  শিক্ষার আরাক পদ্ধতি আহান, learning by examples। অবশ্য, সৃষ্টিশীল কল্পনা করানি পারানি, সৃষ্টি করানি পারানি এতা মাউসাৎ গুণ। এসাদে রীতিনীতির জ্ঞানে ঔ মাউসাৎ গুণ ঔতারে আরাকও বিশুদ্ধ করের, সৃষ্টি ঔতারে আরাকও উন্নত পর্যায় আহানাৎ নিয়া যানির কেইরাকহান হংকরে দের। তাল-মান-লয় জ্ঞান এতা মাউসাৎ গুণ। যেগরাং আছে ঔগই এলা হুনে হুনেই ডাঙর ইসালপা আগ অনি পারের। নেই ঔগ খলপাংপাগও অনি নুৱারিয়া জীবনহান থার। রাগ-রাগিনীর, স্থায়ি-অন্তরার জ্ঞানে ইসালপা ঔগরে আরাকও গজর থাকে নিয়া যারগা। গল্পর বেলায়ও ইমে আকহান। কীট্‌সর কবিতার গজে পাচ বছরর কোর্স করলেই কিতা কীট্‌সর সাদানে কবিতা আহান ইকরানি পারতাইথাং,? কীট্‌সর আরুপি সৃষ্টিশীলতা ঔহান থানি লাগতই। নাইলে হাবি ইংরাজি অধ্যাপক কীট্‌স্‌, হাবি রবীন্দ্র বিশেষজ্ঞ রবীন্দ্রনাথ অইলাইছ। পৃথিবী এহানাৎ কীট্‌স্‌ বার রবীন্দ্রনাথ চারাপহান অইলাইছ। আমি দেহিয়ার, সাহিত্যতত্ত্ববিদ ঔতা প্রায় সাহিত্যিক অনি নুৱারতারা। অবশ্য ব্যতিক্রমও আছি। কারণহান সাহিত্যতত্ত্বর জ্ঞান বার সৃষ্টিশীলতা আকহান কথা নাগই। আহির ডাক্তর  আগই আহির সামগ্রিক সৌন্দর্য ঔহান অনুভব করানি নুৱারতে পারে। নিঙল আগর অপরূপ আহিথম তারাং কেইস আহান বা স্পেসিমেন আহান। দেহানির লগে লগে মায়োপিয়া, মেট্রপিয়া না হাইপার মেট্রপিয়া অছে ঔহানর পরীক্ষাৎ বা তদন্তৎ গইগ অর। নিঙল ঔগ কুরংগনয়নীগ ঔহান নাহে দেহের, সৌন্দর্য ঔহান অনুভব করানি নুৱারের। ঠিক ঔসাদে গল্পর তাত্ত্বিক জ্ঞান থাইলেই গল্পকার আগ অনি নার। আজীবন সত্যনিষ্ঠার সাধনা, সমাজহানর বারিক বিশ্লেষণ করানির ক্ষমতা, সমাজর মানুর মনর ভিতরগ দেহানি পারানির মনোবীক্ষণিক দৃষ্টি, অনুভূতির গভীরতা, ভাষা প্রয়োগর নিপুণতা থাইলেহে গল্পকার আগ অনির সম্ভাবনা থারতা।

 গল্পর লেখকর ভূমিকাহান অরুণাচল বা শিলঙর সাদানে নিরিবিলি লামে যারগা হুরকাং বিমানর পাইলট আগর সাদানে। হাবি পাইলটগই লৌশিল করানি লাগের। গল্প আহান যেমন বিমানহানর নির্দিষ্ট ফর আহান। পইলাই এফিরকার ফরহানর লক্ষ্যস্থলহান তারতা হারপানি লাগতই। সিচ্চিল ঔ চরিত্র ঔতারে পাইলটগই বিমানহানাৎ কানি দিতই যেতারতা বর্তমান গল্পহানাৎ বিশেষ ভূমিকা আকেইহান পালন করানিরতা আছে। পাইলটগই ঔ ভূমিকার প্রমাণ স্বরূপ টিকেট বার পরিচয় পত্র দেহানি পারতাই ঔ চরিত্র ঔতারে পরীক্ষা করিয়া বিমানহানাৎ বহানি দিতই। চরিত্র ঔতাই নিজর লগে য়াং বকচা আহানহে থনি পারতাই। বাকি বকচা লেপকরা ওজন বার পরিসীমার ভিতরে লাগেজ স্পেসে  বুক করিয়া থনি পারতাই। অর্থাৎ গল্পকারে চরিত্র রূপায়ণর প্রয়োজনীয় বস্তু চরিত্রর লগে দিতই, বাকি ঔতা ডিটেলিং এ দিতই।

বিমানহান চালু করানি, পটভূমির রানৱেগদে দাবহান লয়া ফরহান লনা, বিমানহানর যাত্রি চরিত্র ঔতারেল লক্ষ্যস্থলহান দিশা করিয়া নির্দিষ্ট গতিৎ এসাদে যানি যাতে চরিত্র ঔতাই তানুর করিল কাম ঔতা – আহানি, কাদানি, প্রেম বার কৌলি – হাবি নুঙেই করে করানি পারতারা। যেতাও করকা, গল্পর রেগুলেটরি নিয়মর ভিতরে করানি থকইতই। অভিজ্ঞ পাইলটগর দায়িত্বহান যাত্রাপথে এয়ার পকেট পারিলমাহি বারা কাপিয়া যানি। লক্ষ্যস্থল ফৌঅনির পিছে বিমানহান লামানির আগে ঠিক সময়ৎ সঠিক সুইচগ টিপেয়া চাকাহানি নিকালানি যাতে বিমানহান পারিচেৎ করে রানৱেগৎ লামিয়া দাবশৌহান দিয়া খামনি পারের। এহানাৎ লেইলেক অইলে, গল্পহান ক্রাশ করলে, কপালথিপা চরিত্রহানি আর জিংতা নাইতে পারে। গল্পকারগই এফিরকার ফরহানাৎ তার লগে আহিলা চরিত্র ঔতারে আন্তরিক ধন্যবাদ দেনি বার কৃতজ্ঞতা জ্ঞাপন করানি নাপাহুরানি – কিয়াবুল্লে, চরিত্র এতার অন্ততঃ কতহান ভবিষ্যতর ফরে বারে বারে আহিতে পারে।

 গল্পর বিচার

গল্প আহান অছে নাছে কিসাদেতে হারপানি? এহান ডাঙর সুৱাল আহান। গল্প আহানর তাত্ত্বিক বিচার গল্পর উপাদান বারো বৈশিষ্টর গজে করানি য়াকরের। ইজ্জু করে, গল্পর উপাদানহানি বারো বৈশিষ্টহানি থাইলে গল্পহান অছে বারো নাথাইলে নাছে বুলানি য়াকরের। সাহিত্যতত্ত্বর পণ্ডিতে এসাদে তাত্ত্বিক বিচার করে পারতারা। হুৎতুমেতে গল্পর চুম বিচার করানি অমাটিক ইজ্জু নাগই। আরাক সাম পথ আগ অইলতাই গল্পল দিনরাতি সানা করানি। এসাদে নংসাং দিন সানা করলে পাকরেকুরা এগরতা আপ্পানে এমনও ক্ষমতা আহান আহিতই, ইমে আতহান দিলেই অর্থাৎ পাকরলেই মাতে পারতই গল্পহান অছে না নাছে। ব্রজেন্দ্র কুমার সিংহর জার্নাল নাঙর লেরিক ঔহানাৎ জেইড পাথর চিনানির য়ারিশৌ আহান আছে ঔহান এপেইৎ দিলে নিয়াম চুনা অইতইছাৎ। জেইডল ফুলদানি, মুকফু, বার আরতাও নানান সখর বস্তু মেস্তরিয়ে হংকরতারা। কনাকশৌ আগ লেরিক তামকরানি নাকরের, খেতির কামও করানি নাকরের। কিতা করিয়াতে জনমহান খেইতই? নিরুপায় অয়া মালকে জেইড মেস্তরি আগরাং পুতকরে নিয়া মাৎলগা – মেস্তরি গিরি, শৌ এগরে গিরিরাং দিলু। এগরে কাম হিকেয়া মানুগ হংকরেদে। পিছেকার দিনে শৌ ঔগ মেস্তরিগরাং গেলগাতাই মেস্তরি ঔগই বাগা জেইডর টুমা আহান দিয়া মাৎল – এরে জেইডর টুমা এহান চেৎকরে ধরিয়া থ। মি নামাতেছু পেয়া নাবেলেইছ। যে লেইসিহানও কর এটুমাতে না এরা দিছকো। শৌ ঔগই দিন এহান ঔটুমা ধরিয়া লেইসি করের। বৌদে বুললে ঔটুমা ধরিয়া বৌদের, চাহা রাধ, আফিং জুগৎ কর – যেতা মাৎলেও ঔটুমা চেৎকরে ধরিয়া করের। সেন্দাহান অইল আরো মেস্তরি ঔগই মাৎল – ঔ টুমা থয়া ঘরে যাগা। পিছেকার দিনে শৌ ঔগ আহিল আরো আরাক জেইড আকটুমা দিয়া মেস্তরি ঔগই মাৎল – এটুমা ধরিয়া লেইসি কর। সেন্দাহান অইল আরো ঔটুমা থয়া শৌ ঔগ ঘরে গেলগা। এসাদে করে মাহা আহানর চুৱা গেলগা আরো আকদিন মেস্তরি ঔগই টুমা আহান দিল আরো শৌ ঔগই আতহানাৎ ধরিয়াই মাৎল – এগতে জেইডগ নাগই।

 এফিরকার সুৱালহান গল্প আহান হবা অছে না নাছে কিসাদেতে হারপানি? এহানর তাত্ত্বিক বারো সাম বিচার করানি নিয়াম চিল। কিয়া বুল্লে, বিচারর রায় বিচারক বেদে তঙাল তঙাল অইতে পারে। গল্প আহানর উপাদানহানি বারো বৈশিষ্টহানি থাইলেই হবা গল্পহান বুলিয়া মাতানি চিল। সাহিত্যতত্ত্বর দৃষ্টিকোণৎত হবা গল্পহান বুলিয়া সার্টিফিকেট দিলেও পাকরেকুরারাং গ্রহণযোগ্য নাইতে পারে। বিশ্ববিদ্যালয়র হবা হবা সার্টিফিকেট থায়াও কতি মানু চাকুরি নাপেয়া বেকার অয়া আছি। ঠিক ঔসাদে, কতি গল্প বেকার অয়া সাহিত্যর মণ্ডলিগৎত নিকুলিয়া পাহুরানির পাতালপুরিৎ মাঙইলাগা ঔতার হিসাব নেই। গল্প আহান এব্বাকার পাকরেকুরারাং গ্রহণযোগ্য নাইলেও ভবিষ্যতর পাকরেকুরারাং নুৱাকরে গ্রহণযোগ্য অইতে পারে। এসাদে উদাহরণ বিশ্বসাহিত্যৎ বপয়া আছে। মোটকথা, গল্প আহানে যদিচৈ পাকরেকুরাগর মনহানাৎ নিয়াম ইম্পেক্ট সৃষ্টি করানি পারেছে, পাকরেকুরাগুরে গল্পহানল য়মকরিয়া নন্দনবৃত্ত ইলয়া ভাবর আকাশহানাৎ ফরদুৱেয়া নিয়া রসসঞ্চার করানি পারেছে, পাকরেকুরাগর মনহানাৎ অনুরণন আহান সৃষ্টি করানি পারেছে, ঔতাইলে মাতানি য়াকরের গল্প ঔহান সার্থক অছে। সার্থক গল্প অবশ্যই হবা গল্প। হবা গল্প আহান লমনির পিছেও না লমর, নংশাং দিন পাকরেকুরাগর নিংশিঙে থার, এবাকার বার আহিতারা নুৱা নুৱা চিরির দাপা দাপা পাকরেকুরারে মুগ্ধ করিয়া কালজয়ী অর। এসাদে করে গল্প আহান ভাষা আহানর সাহিত্যৎ মণি আগ অয়া ঙালয়া থার। এসাদে নানার ভাষার মণিল মণিময় মণিপুরহান বিশ্বসাহিত্য।

গল্পর বিচারর য়ারিতে দিলাং চুম, বিচারকগতে কুংগ? কুংগই বিচার করতইগ? গল্পর সমালোচকে? সাহিত্যর বিচারশালাৎ সমালোচক অইলাতাই উকিল। উকিলে পক্ষে বিপক্ষে নানান যুক্তিল নিজর মতামত পেশ করতারা, তর্কাতর্কি করতারা কিন্তুমান রায় দেনি নুৱারতারা। রায় দিতারাই বিচারকে। সাহিত্যর বিচারকর আসনে ঙালয়া বহানি পারতারাতাই সিচ্চিল দীক্ষিত পাঠকে। ঔহানে গল্পর দীক্ষিত পাঠক আগরতা গল্পর গজে অগাধ জ্ঞান আছে বুলিয়া নিংকরানি অর। কিয়া বুল্লে, দীক্ষিত পাঠক আগই গল্পকারর, তাত্ত্বিকর, সমালোচকর গজর থাকে বিচারকর আসনে বয়া গল্পর বিচার করেরতা থকয়া। ঔহানে গল্পর দীক্ষিত পাঠক আগ অনা গল্পর লেখক আগ অনিৎত নিয়াম কঠিন কামহান। এপেইৎ সাহিত্যিক এতারে বিশেষ করিয়া গল্পর লেখক এতারে হেইচা আহান করানি মনাউরি, গল্পর লেখক আগই গল্পর পাঠক আগরে লেখকরাংত নিয়াম জ্ঞানী, মেধাবী, হারপারগ বুলিয়া নিংকরানি। ভূলেও হার নাপারগ বুলিয়া না নিংকরানি। আমারমানুৱে হার নাপেইতাই বুলিয়া খানি সহজ করে ইকরেছুতা বুলের জন ঔগ নিজে অবুজগ, লেখকগই নাগই। আদর্শ, জ্ঞানী, মেধাবী, হাবি হারপার কাল্পনিক দীক্ষিত পাঠক আগরকা, যেগ এবাকা জরম নাথাইলেও, আকদিন জরম অইতই এ আশালো ইকরলে দিনে দিনে গজেদে কানা নাইলে অহংকারি লেখকরতা একচিতে মাতৃভূমিৎ পতন সইনেই।


 

স্মৃতি কুমার সিংহ বিষ্ণুপ্রিয়া মণিপুরী সাহিত্যৎ নাংপালপা গল্পকার আগ

সৌজন্যঃ কালীপ্রসাদ দর্শন, Vol 3, No 1, 2016

Advertisements